Këngëtari italian Albano Carrisi është futur në “listën e zezë” të Ukrainës, duke u konsideruar si rrezik kombëtar. Lista është hartuar nga Ministria e Kulturës së Ukrainës pas kërkesës së Këshillit të Sigurisë dhe Mbrojtjes Kombëtare. Në këtë listë përfshihen 147 njerëz, që Ukraina i konsideron me rrezikshmëri të lartë.
Këngëtari nga Puglia nuk e ka fshehur kurrë admirimin për presidentin rus Vladimir Putin si edhe ka performuar në Moskë me rastin e 100-vjetorit të themelit të KGB-së. Mendohet se kjo është arsyeja se përse Albano Carrisi është bërë pjesë e kësaj liste.
Albano Carrisi dhe ish-bashkëshortja e tij Romina Poëer në vitet ’80 dhe ’90 kanë qenë të famshëm në Bashkimin Sovjetik. “Në vitin 1986 kam zhvilluar një turne në Rusi, me 18 koncerte në Leningrad dhe 18 në Moskë. Gjatë tyre, kam takuar edhe Vladimir Putin, atëherë shef i KGB-së. Më pas, në vitin 2004 kam kënduar në Kremlin për Vitin e Ri. Në atë festë ishte edhe Boris Eltsin dhe familja e tij. Për herë të tretë e kam takuar nëntorin e vitit 2017, në festën e njëqind vjetorit të KGB-së, ku ishim shumë këngëtare dhe secili këndoi nga dy këngë”, ka treguar në një intervistë të mëparshme Albano Carrisi./Opinion.al
