Drejtori i UEFA-s për turneun e Europianit, Martin Kallen, ka thënë në një intervistë për gazetën javore gjermane “Sport Bild”, se nëse ka kërcënime për sulme terroriste, ndeshja mund të shtyhet për ditën tjetër, por me dyer të mbyllura për tifozët.
Zyrtari i UEFA-s ka sqaruar se po punohet me organizatorët e “Francë 2016” për të rritur sigurinë në stadiume, por asgjë nuk është përjashtuar.
Sipas tij, nëse ka vërtetë indicie për sulme terroriste, organizatorët nuk kanë mundësi të garantojnë sigurinë e ndeshjes në një stadium tjetër pasi ka pak kohë dhe zhvendosja e takimit do të krijonte probleme për tifozët, pasi ata kanë prerë biletat dhe kanë pronotuar hotelet.
Mundësia që ofron ai është që ndeshja të zhvillohet me dyer të mbyllura për tifozët.
Në një deklaratë për “Associated Press”, UEFA ka bërë të ditur se “ende nuk jemi në dijeni të ndonjë kërcënimi specifik, por duam thjesht të jemi të përgatitur”.
