ISIS po tenton të rekrutojë shtetas shqiptarë për të luftuar në Itali. Alarmi vjen nga shërbimet inteligjente italiane, që raportojnë se kryesisht shtetasit shqiptarë, janë më të preferuarit, pasi njohin shumë mirë gjuhën.
Ballkani e veçanërisht Shqipëria, po kthehen në vendin e preferuar për rekrutim xhihadistësh.
E përditshmja italiane “Il Secolo XIX”, shkruan se kriteret e kërkuara nga rekrutuesit janë dy; njohja e mirë e italishtes dhe aftësi të mira në përdorimin e kompjuterit. Shuma që ofrohet në këmbim është rreth 2 mijë euro në muaj, një shifër e lartë kjo duke pasur parasysh nivelin ekonomik vendor.
Qëllimi i këtyre celulave, sipas autoriteteve italiane, është infiltrimi i këtyre personave në mjediset ekstremiste islamike të Italisë dhe kjo bëhet më së miri nëpërmjet individëve të padyshuar, të ardhur nga Shqipëria.
Shqipëria është një problem shumë i madh për Italinë, e për pasojë edhe për Europën, në frontin e ri të luftës anti-terrorizëm, shkruan gazeta italiane.
Edhe më herët, mediat e vendit fqinj kanë ngritur alarmin për përfshirjen e shtetasve shqiptarë në luftë përkrah ISIS. E përditshmja “La Stampa”, në ditët e para të 2016 e cilësoi Shqipërinë si “udhëkryqin e xhihadistëve”.
