Një ngjarje e çuditshme ka ndodhur në dje në avionin e linjës Tiranë-Bergamo në Itali, ku një 75-vjeçar shqiptar tërhoqi levën e sigurisë në aeroplan duke alarmuar pasagjerët e tjerë.
Gazeta ‘Shqip’ shkruan se 75-vjeçari Muharrem Ç. shfaqi tension në momentin kur avioni ishte duke u ngritur nga pista e Rinasit gjatë kohës që stjuardesa po bënte shpjegimet rutinë për vendosjen e rripit etj.
Gjatë kësaj kohe, i moshuari tërhoqi levën e sigurisë dhe tentoi të hapte derën, por është vënë menjëherë nën kontroll nga personat përgjegjës të fluturimit. Pasi u sqarua e gjithë situata, rezultoi që i moshuari të kishte ankth për shkak se ishte fluturimi i parë dhe në momentin që avioni do të ngrihej nga pista ai u çorientua dhe tentoi të dilte.
Ky veprim i tij shkaktoi panik tek pasagjerët e tjerë, duke pasur parasysh edhe situatën e sulmeve terroriste në Evropë, pasi menduan se i moshuari mund të ishte ekstremist. Por, gjithçka u zgjidh brenda pak minutash dhe pasi mbërriti në Itali, 75-vjeçari iu dorëzua autoriteteve e më pas familjarëve të tij.
