Zyra e Kufirit dhe Migracionit në Tiranë ka marrë kërkesën për azil politik të shtetasit turk Selami Simsek.
Simsek u arrestua sëbashku me Harun Çelik disa muaj më parë në aeroportin e Rinasit nga autoritetet shqiptare për arsye se tentuan të kalonin kufirin me dokumente të falsifikuara.
Ata akuzohen në Turqi si mbështetës të lëvizjes Gylen dhe për këtë arsye kanë kërkuar të mos dëbohen nga Shqipëria sepse në vendin e tyre i rrezikohet jeta. Më 1 janar autoritetet shqiptare nuk morën parasysh kërkesën e Çelik dhe e dëbuan atë duke e kthyer në Turqi. Ky veprim shkaktoi reagim në institucionet e BE-së, ku disa europarlamentarë kërkuan sqarime pasi pretendojnë shkelje të Kartës Europiane të të Drejtave të Njeriut.
Selami Simsek ndërkohë është ende në Shqipëri. Në kërkesën e tij për autoritet shqiptare shkruhet se në Turqi i rrezikohet jeta, pasi shteti atje e cilëson si gylenist.
“Këtë kërkesë e paraqes pranë zyrës së Kufirit dhe Migracionit Tiranë, që të fillojë procedura në emrin tim sa më shpejt të jetë e mundur, për azil. Këtë kërkesë e paraqes për shkak se në Turqi, shteti mendon që unë jam anëtar i Lëvizjes Gylen, dhe mendoj se atje mund t’i nënshtrohem veprimeve keqtrajtuese”, shkruan Simsek, në letrën drejtuar autoriteteve shqiptare.
Pas dëbimit, Harun Çelik u arrestua pasi mbërriti në Turqi dhe ndaj tij po zhvillohet procesi gjyqësor. Kujtojmë se Turqia e konsideron Fetullah Gylen si përgjegjës për përpjekjen për grusht e shteti që dështoi në vitin 2016. Mbështetësit e kësaj lëvizjeje janë persekutuar nga pushteti i Erdogan pasi cilësohen si armiq të vendit. Megjithatë ende nuk është prezantuar një provë e cila lidh Lëvizjen Gylen me tentativën për grusht shteti. /Opinion.al
