Elisa Spiropali, Ministre Shteti për Marrëdhëniet për Parlamentin, ka reaguar pas akuzave të bëra nga selia blu. Në një status në Facebook, Spiropali mohon të gjitha akuzat, duke thënë se vëllai i saj nuk ka përfituar kurrë fonde publike. Ajo paralajmëron se do ta çojë në gjykatë këtë shpifje.
“E porosit Saliu, pastaj e nxjerr një frëngji e paguar nga fondet e zeza te Shqupit, pastaj del në këndin e shpifjeve dixhitale të Saliut, pastaj e këndon recituesja e Shqupit dhe ja u krye hedhja e bojës mbi tjetrin! Sot ishte radha ime dhe këtë radhë u bë im vëlla mish për top i kësaj opozite mavri me boje. Vëllai im nuk ka përfituar kurrë dhe asnjëherë asnjë kontratë apo fond publik, as kur isha beqare, as kur u martova, as kur isha aktiviste, as kur isha drejtore, e as tani si ministre. Po fjalët me këta gojështhurur janë të tepërta. Padia është e vetmja rrugë me këta bartës e përçues të horrllëkut politik. Në gjykatë le të provojnë çfarë akuzojnë ose përndryshe paratë për dëmin do të shkojnë për të ndihmuar kopshtin e Kolonjës”, shkruan Elisa Spiropali.
Më herët gjatë ditës së sotme, Jorida Tabaku dhe Lealba Pelinku akuzuan se nëpërmjet një kompanie që ka kaluar në duart e familjarëve të Spiropalit, janë marrë në mënyrë abuzive miliona lekë nga buxheti i shtetit.
“Kjo kompani është krijuar në 9 shtator në të njëjtën ditë që u krijua qeveria Rama. Dokumentet zyrtare konfirmojnë se Enkli Spiropali, vëllai i zëdhënëses së qeverisë që në atë kohë po merrte emërimin si Drejtoreshë e Doganave krijoi një kompani që e quajti SLM me qendër në Fier dhe me kapital 1 milionë lekë të vjetra. Brenda pak muajve, kompania e sapokrijuar fitoi tenderin e parë në 27 mars 2014. Bamirësi ishte kunati i tij, bashkëshorti i Elisa Spiropalit. Për të fshehur gjurmët e konfliktit të interesit dhe të ndonjë vepre tjetër penale vëllai i saj e shiti kompaninë me letra në 8 prill 2014. Kompania u shit brenda familjes, tek kushëriri i bashkëshortit. Vlera e shitjes ishte 1 milionë lekë, megjithëse kompania fitoi një tender prej 6 mln lekësh”, ka thënë Tabaku.
