Pas deklaratës së Partisë Socialiste, e cila e cilësoi rrëzimin e kërkesës nga Gjykata Administrate në lidhje me dekretin e Presidentit Bujar Nishani, për zgjedhjet në Dibër, si në kundërshtim me Kodin e Procedurës Civile e Administrative dhe si një dështim të radhës për drejtësinë, ka ardhur dhe reagimi i Partisë Demokratike.
Në një deklaratë të shpërndarë për mediat, selia blu thotë se Kryeministri Rama jo vetëm kërcënon gjyqtarët në mënyrë kriminale kur marrin vendime që nuk i pëlqejnë atij, por i del edhe në mbrojtje këtyre kërcënimeve.
Sipas PD, këtë e vërteton deklarata e tij e pasdites, që konfirmon veprën penale të kërcënimit të gjyqtarëve për të shtyrë zgjedhjet në Dibër. Ndaj ajo, thotë PD, duhet t’i shërbejë prokurorisë të shkundet e të nisë menjëherë hetimin penal për këtë kërcënim.
Por edhe më e rëndë se sa vetë sulmi e kërcënimi mafioz ndaj gjyqtarëve, thuhet në deklaratë, është mbrojtja e këtij sulmi dhe vendosja e Edi Ramës në pozitën e supergjyqtarit që interpreton ligjin dhe sulmon vendimin e gjykatës.
“Kryeministri në detyrë bën mirë ta harrojë këtë ëndërr sulltanësh për të pasur të gjitha pushtetet nën sqetull. Ai nuk po ushtron prej kohësh as detyrën e tij. Ka hequr dorë me kohë nga përgjegjësia për tiu shërbyer qytetarëve. Puna e tij sot nis e mbaron duke mbrojtur oligarkët dhe bandat e drogës. Ndaj e do drejtësinë me cdo kusht, sepse i dhemb ndeshkimi qe e pret nga vota e qytetarëve dhe nga ligji nesër. Shqiptarët duan drejtësi e ligj. Shqiptarët nuk duan drogë e sundim bande. Shqiptarët mbarë e dinë se Shqipëria do të jetë më mirë pa Edi Ramën”, përfundon deklaratën e saj Partia Demokratike./tvklan.al
