Kryetari i Grupit Parlamentar i PD, Gazment Bardhi ka deklaruar në emisionin “Opinion” se partia më e madhe opozitare do të bëjë një kallëzim penal ndaj Presidentit Barjam Begaj.
Bardhi e akuzon Begajn se para se të merrte detyrën e Presidentit është i përfshirë në afera korruptive si dhe në privatizimin e pronave ushtarake.
“Presidenti është i vetmi njeri në këtë glob që vëllai i vet i blen shtëpi me para të fituara në emigracion, mami dhe babi blejnë një shtëpi dhe ia shesin presidentit për 2 milionë lekë të vjetra, është i vetmi njeri që duke punuar në ushtri ka privatizuar prona pa kundërshpërblim të ushtrisë, por këto janë histori që nuk kanë lidhje me Kushtetutën, prandaj ne nuk i kemi bërë publike”,-tha Bardhi.
Pjesë nga intervista
Gazment Bardhi: Patjetër. Do të bëjmë kallëzim penal ndaj presidentit. A e dini ju që presidenti është sot pronar, nga një apartment 166 metër katrorë, sot është duke ndërtuar tri vila?
Blendi Fevziu: Ku e dini që po ndërton presidenti vila?
Gazment Bardhi: Ne jemi opozita e vendit që mbledhim informacione, verifikojmë informacione.
Blendi Fevziu: Gjysma e informacioneve janë false, janë kaotike, janë të shtuara.
Gazment Bardhi: Më thuaj një denoncim që unë kam, bërë në këtë studio që ka dalë fals.
Blendi Fevziu: Pse keni targetuar presidentin?
Gazment Bardhi: Kemi targetuar Edi Ramën, nuk është Bajram Begaj.
Blendi Fevziu: Po i bini pragut që të dëgjojë dera…
Gazment Bardhi: Ne po i biem modelit korruptiv që Edi Rama çon në çdo institucion të këtij vendi./Opinion.al
