Në bregun e Vjosës mbillet drogë me shumicë. Kështu është shprehur disa herë ish-Kryeministri Berisha. Ai ka akuzuar drejpërdrejt Tahirin si “padronin” e drogës.
Sot policia thotë se për 12 orë ka bërë 3 operacione në Vlorë, ku janë kapur 7 vetë dhe sekuestruar mbi 72 kg drogë.
Gjatë operacionit të koduar “Vjosa”, policia arrestoi 47-vjeçarin Fatmir Hameti, 47 vjeç, i dënuar më parë për drogë. Ai u kap me 25 kg e 500 gr kanabis , të cilën e kishte fshehur në garazhin e një banese në lagjen “Isa Boletini”në Vlorë. Droga ishte sistemuar në dy thasë plastikë të zinj dhe në një bidon plastik, gati për ta shitur.
“Llakatundi” vuri në pranga tre persona: Ilir Hoxhaj, 26 vjeç, Shpendi Hoxhaj, 27 vjeç dhe Endri Hoxhaj, 23 vjeç. Të tre të rinj u arrestuan në rrugën nacionale Babicë – Vlorë, pasi gjatë kontrollit të ushtruar në automjetin me të cilin udhëtonin tip “Furgon Hundai” është gjetur një sasi me lëndë narkotike prej 29 kg e 500 gr kanabis. Droga ishte futur në 5 thasë plastikë të zinj.
Në operacionin e koduar “Mitsubishi”, policia arrestoi tre persona: Ervis Xhaferaj, 28 vjeç; Hekuran Gerbi, 24 vjeç dhe Klodjan Nazëraj, 30 vjeç. Gjatë kontrollit të ushtruar në automjetin tip “Mitsubishi” është gjetur 17 kg e 500 gr kanabis.
