Aleksandër Ndrejaj, avokati i Plarent Dervishajt ka hedhur poshtë të gjitha akuzat për klientin e tij lidhur me zbardhjen e vrasjeve të vitit 2005.
Avokati i Dervishajt është shprehur për mediat se Dervishaj nuk ka lidhje me ngjarjen , për të cilin është shpallur në kërkim bashkë me Lulzim Berishën për ekzekutimin e Klodian Saliut dhe biznesmenit Vajdin Lamaj.
“Dervishaj nuk ka lidhje me dy ngjarjet e përmendura nga SPAK. Pas gjithë këtyre paçavureve fshihen interesa politike dhe nuk i shërbejnë drejtësisë për zbardhjen e së vërtetës”, tha ai.
15 vite nga ekzekutimi, SPAK akuzon Emiljano Shullazin dhe Viktor Ymerin për vrasjen e biznesmenit Vajdin Lamaj dhe mikut të tij, Artan Arsi në 27 shkurt të vitit 2005 me eksploziv në pallatin ku banonte në Tiranë.
SPAK publikoi njoftimi, në të cilin thuhet se hetimi për vrasjen e Lamajt dhe Arsit ishin pezulluar shumë vite më parë dhe janë rihapur në vitin 2020. Në 2 dhjetor, gjykata ka vendosur masë sigurie arrest me burg për shtetasit Lulzim Berisha, Plarent Dervishaj, Indrit Taulla dhe L. Reçi, të akuzuar për vrasjen e Lamajt dhe Arsit. Por dy të dyshuarit, Lulzim Berisha dhe Plarent Dervishaj nuk janë arrestuar, pasi rezultojnë në arrati.
“Për shtetasit L. Berisha dhe P. Dervishaj është bërë shpallja në kërkim ndërkombëtar dhe po punohet ngushtësisht me autoritetet e huaja për lokalizimin dhe kapjen e tyre,” thuhej në njoftim. Luftar Reçi, bashkëpunëtori i drejtësisë ka bërë rrëfimin e tij, që çoi në zbardhjen e ngjarjes pas 15 vitesh.
REAGIMI NGA AVOKATI I PLARENT DERVISHAJT
U paraqita pranë GJKKO për t’u pajisur me një kopje të vendimit për caktimin e masës së sigurimit personal ndaj shtetasit Plaurent Dervishaj.
Dua të deklaroj se akuza e ngritur nga Prokuroria e SPAK ndaj tij është një sajesë e orkestruar për qëllim dezinformimin e publikut dhe në dëm të DREJTESISE NË RASTIN KONKRET Të SPAKUT. Dua të deklaroj se klienti im nuk e njeh dhe nuk ka dijeni se kush është dëshmitari i drejtësisë dhe mohon kategorikisht që të ketë njohje me të, nuk ka asnjë lidhje me të dy ngjarjet e pretenduara nga Prokuroria.
Do ndjekim të gjitha procedurat ligjore për vënien në vend të drejtësisë, duke ankimuar vendimin per caktimin e masës së sigurimit dhe duke kërkuar Prokurorisë së SPAK PROVA DHE FAKTE MBI PRETENDIMIN E NGRITUR.
Në gjykimin tim,mendoj se pas të gjithë kësaj paçavureje fshihen interesa politike që nuk i shërbejnë Drejtësisë dhe zbardhjes të së vërtetës./ Opinion.al
