Aktori i njohur shqiptar, Kasem Hoxha, i cili është ftuar për të drejtuar edicionin e 55-të të Festivalit të RTSH-së, së bashku me këngëtaren e njohur Ledina Ҫelo, në “Padite në Top Channel”, ka treguar më shumë për jetën e vet para se të fitonte famën si aktor. I nisur drejt Gjermanisë me valën e madhe të ambasadave, Hoxha tregon se aventurat deri sot nuk kanë qenë të pakta. Megjithatë, gjithҫka ia vlejti më në fund.
I larguar nga Shqipëria më shumë se 22 vjet më parë, Kasemi tregon se festivalet e viteve të fundit nuk i ka ndjekur: “Hera e fundit që kam parë festivalet në RTSH-së, për të qenë i sinqertë, ka qenë para viteve ’90” – tregon ai i keqardhur, por ama largësia nuk e ka penguar për të bërë tifozin për përfaqësueset shqiptare në Eurovision: “Sigurisht, ato këngë i kam dëgjuar, kam bërë edhe tifo për to, por kam qenë larg, i ikur, dhe s’mund t’i ndiqja.”
Për besimin që i është dhënë nga drejtuesit e RTSH-së për prezantimin e Festivalit, Kasemi thotë se kjo është hera e tij e parë dhe për këtë kërkon mirëkuptimin e publikut: “Shpresoj shumë t’ia dal, por shpresoj që edhe publiku të më kuptojë. Është hera ime e parë në rolin e prezantuesit, ndaj do përpiqem të tregon anën time të mjaltit”, – thotë ai.
Për një aktor, thuhet se është më e thjeshtë të jetë live, meqenëse është i mësuar me publikun, por për Kasemin, kjo mbetet për t’u parë. Edhe ai vetë e pranon: “Nuk e di se si është, do ta provoj. Por gjithҫka që është live, nuk është e thjeshtë, nuk është njëlloj si teatri. Një show kaq i madh e me traditë është diҫka tjetër. Ti nuk ke dëshirë t’ia lejosh vetes të bëhen gabime, megjithatë, edhe nëse kjo ndodh, publiku besoj do na mirëkuptojë…”
Ndërsa për Ledinën, ah, ajo ka një të metë: “Ledinën nuk e njihja më parë. Nuk e dija që jetonte në Gjermani, e kam njohur përmes këngës. Besoj se midis nesh do të funksionojë… Është pak më e gjatë se unë…. “ – thotë ai me të qeshur sikur kjo të ishte “e meta” e tij, por beson se edhe Ledina, ashtu si ai, do të bëjë maksimumin dhe do të japë më të mirën nga vetja./revistaclass
