Aktivisti i burgosur Ales Bialiatski nga Bjellorusia, organizata ruse Memorial dhe grupi Qendra Ukrainase për Liritë Civile kanë fituar Çmimin Nobel të Paqes për vitin 2022.
Njoftimi u bë të këtë të premte në Institutin Norvegjez Nobel në kryeqytetin e Norvegjisë, Oslo.
“Komiteti Norvegjez i Nobelit dëshiron të nderojë tre kampionë të shquar të të drejtave të njeriut, demokracisë dhe bashkëjetesës paqësore në vendet fqinje Bjellorusi, Rusi dhe Ukrainë”, tha kryetarja e Komitetit Berit Reiss-Andersen, e cila gjithashtu i bëri thirrje Bjellorusisë që të lirojë Bialiatski nga burgu.
Çmimi Nobel për Paqe, me vlerë 10 milionë korona suedeze, ose rreth 900,000 dollarë, do të jepet në Oslo më 10 dhjetor, në përvjetorin e vdekjes së industrialistit suedez Alfred Nobel, i cili themeloi çmimet në testamentin e tij të vitit 1895.
“Laureatët e Çmimit të Paqes përfaqësojnë shoqërinë civile në vendet e tyre. Ata kanë promovuar për shumë vite të drejtën për të kritikuar pushtetin dhe për të mbrojtur të drejtat themelore të qytetarëve. Ata kanë bërë një përpjekje të jashtëzakonshme për të dokumentuar krimet e luftës, abuzimet e të drejtave të njeriut dhe abuzimin me pushtetin. Së bashku ata demonstrojnë rëndësinë e shoqërisë civile për paqen dhe demokracinë”, tha Komiteti Norvegjez i Nobelit./Opinion.al
