Tre ditë pas miratimit të aktit normativ “anti-KÇK”, policia ka nisur sekuestrimin e pasurive të grupeve kriminale. Operacioni Forca e Ligjit rrethoi resortin “Golden” të familjes Hajri në Shijak, disa anëtarë të së cilës janë arrestuar për pengmarrjen dhe vrasjen e Jan Prengës.
Pronari i resortit, Altin Hajri, vazhdon te jetë ende në kërkim nga policia, ndërsa rezulton i dënuar edhe nga drejtësia italiane.
Ndërkohë gazetarja Dorjana Bezat, në emisionin Opinion, ku u trajtua pikërisht ky zhvillim tha se ka një listë me 250 persona që priten të goditen.
“Ka rreth 6 muaj që kjo strukturë ka kërkuar informacion nga drejtoritë e qarqeve, për personat që kanë qenë të dënuar apo që janë nën hetim, për vrasje, apo trafikim narkotikësh. Ka qenë çdo drejtori qarku që ka dhënë informacion, për personat që janë nën hetim policia nuk kishte kompetenca. Është një listë me 250 persona. Janë rreth 150 punonjës policie, që janë zgjatim i Forcës së Ligjit. Janë agjentë, që janë trajnuar edhe fizikisht dhe nga ana intelektuale. Është forcë e stërvitur ekstra për këtë gjë. Këta janë një strukturë më vete, drejtues i këtyre është drejtori i policisë kriminale. Në listë, janë emra që janë përfolur gjerësisht dhe në media”, tha gazetarja.
Paketa ligjore mbi të cilën është ngritur kjo strukturë anti-KÇK, parashikon që për subjektet dhe bizneset të cilat nuk justifikojnë dot pasurinë dhe të ardhurat, dosja e tyre do të shkojë në SPAK. Kësaj të fundit i jepet 15 ditë kohë, dhe 15 të tjera do i jepen Gjykatës që të shprehet me vendim për vendosjen e sekuestros./ Opinion.al
