Drejtori i Përgjithshëm i Doganave, Arlind Gjokuta njoftoi sot për mediat se nga kontrolli i kompanive që importojnë, tregtojnë apo prodhojnë karburante dhe gaz, të gatshëm për konsum janë konstatuar rreth 1 milionë euro detyrime të munguara.
Gjokuta tha se në kuadër të aksionit anti-informalitet janë kontrolluar “8 magazina të lira për karburantet me vendndodhje në Porto Romano, Lezhë dhe Vlorë, 4 magazina të lira për produktin Gaz i Lëngshëm Natyror me vendndodhje në Vlorë dhe PortoRomano, si edhe 3 rafineritë e përpunimit të naftës bruto në Fier, Ballsh dhe Elbasan”.
“Si rezultat i këtij procesi” tha Gjokutaj, “kanë rezultuar mangësi nga gjendja e deklaruar te të gjithë operatorët që operojnë me karburant në magazinat e lira, 1 operator që operon me gazin natyral të lëngshëm dhe 1 rafineri prodhimi, më konkretisht si më poshtë:
Royal Trade Company Sha, Porto Romano Oil Sha, Kastrati Sha, Genklaudis Sha, Europetrol Sha, Eroil Sha, Bolunmez Petrol Sha, La Petrolifera Italo – Albanese Sha, Mare Oil Sh.A, Tosk Energji Sha”
“Në total, nga i gjithë procesi i kontrollit rezultuan diferenca për: 752,015 litra karburant dhe 77,451 litra gaz” shtoi ai.
Kontrolli ndaj këtyre kompanive ishte ushtruar për periudhën nga viti 2018 deri në gusht të vitit 2019. Gjithësej dëmi ekonomik që i ishte shkaktuar shtetit përllogaritej në 1.06 milionë euro.
Gjokutaj bëri me dije gjithashtu se përvec penalizimit të subjekteve ka nisur verifikimi edhe në administratën e doganës për këtë rast.
“Për sa më sipër, bazuar në mangësitë e evidentuara, perveç penalizimit të subjekteve, ka nisur procesi i verifikimit të përgjegjësive brenda administratës doganore. Aktualisht janë liruar nga detyra 5 doganierë mbikqyrës,janë thirrur në komisionin disiplinor 9 doganierë të tjerë” deklaroi drejtori i përgjithshëm i doganave. /Opinion.al
