Dy persona janë arrestuar dhe një i tretë është shpallur në kërkim nga Policia e Vlorës pasi akuzohen se kanë marrë peng një 32-vjeçar dhe kanë qëlluar me armë ndaj efektivëve blu.
Damiano Rrapaj 19 vjeç dhe Aleksandër Gjatari 32, së bashku me personin e shpallur në kërkim 29-vjeçarin me inicialet K.Gj, më 30 maj në lagjen “28 Nëntori” kanë marrë me forcë në makinën e tyre 32-vjeçarin me inicialet Y.K. Sipas policisë kjo ka ndodhur pas një grindje mes tyre për motive të dobëta. Makina tip “Benz” me targë AA656KC dhe kanë lëvizur me shpejtësi në drejtim të “Ujit të ftohtë”, por forcat e policisë e kanë pikasur dhe menjëherë janë vënë në ndjekje të tyre.
Me të parë shërbimet nga pas, autorët kanë lënë të lirë personin e marrë peng, pranë stacionit të furgonave të Kaninës. Më pas, gjatë rrugës në ikje, kanë qëlluar me armë zjarri në ajër, kanë braktisur mjetin në Jonufër dhe janë larguar në drejtim të paditur.
Gjatë hetimeve intensive në lidhje me ngjarjen, Policia ka bërë të mundur identifikimin, kapjen e 2 prej tyre dhe shpalljen në kërkim e personit të 3, për veprat penale “Heqja e paligjshme e lirisë”, “Prodhim dhe mbajtje pa leje e armëve luftarake dhe municionit”, “Prishja e rendit dhe sigurisë publike”, “Mosbindja ndaj urdhrit të punonjësit të policisë” dhe “Moskallëzim krimi”
