Prokuroria Themelore në Pejë se bashku me Policinë e Kosovës, janë duke zhvilluar një aksion në disa lokacione të rajonit të Pejës, në dyshimet se atje po zhvillohen veprimtari kriminale.
Zyrtarët serbë thanë se ky aksion ka të bëjë me mbylljen e organeve të përkohshme, që punojnë sipas sistemit serb.
Zëdhënësi i Prokurorisë Themelore në Pejë, tha se aksioni po zhvillohet në “disa lokacione të cilat gjenden në rajonin e Pejës, Istogut dhe Klinës”.
Pas përfundimit të aksionit, Nikqi u shpreh do informojnë opinionin për detajet e tij.
Nga pala serbe kanë thënë se aksioni ka të bëjë me mbylljen e komunave, që punojnë sipas sistemit serb.
Presidenti i Serbisë, Aleksandar Vuçiq, tha se Policia e Kosovës po kryen një aksion të madh dhe ka bastisur organet e përkohshme në Pejë, përkatësisht në Gorazhdevc, në Osojan të Istogut.
Ai tha se Policia e Kosovës ka hyrë në qendrën mjekësore në Osojan dhe e kanë mbyllur të njëjtën.
Zyra për Kosovën në Qeverinë serbe tha se kryetarët e organeve të përkohshme janë ndaluar nga Policia e Kosovës për t’u marrë në pyetje.
Shefi i kësaj zyreje, Petar Petkoviq, e cilësoi aksionin policor si “vazhdim të spastrimit etnik” të serbëve që jetojnë në Kosovë.
Lista Serbe, partia më e madhe e serbëve në Kosovë, i bëri thirrje Beogradit zyrtar që t’i kërkojë Bashkimit Evropian dhe misionit paqeruajtës të NATO-s në Kosovë, KFOR, që të pengojë “qërimin e hesapeve” nga ana e kryeministrit të Kosovës, Albin Kurti, me komunitetin serb.
“Sado e vështirë të jetë për të gjithë ne, duhet të ruajmë qetësinë e njëri-tjetrit, sepse as kjo e keqe nuk do të zgjasë përgjithmonë. Veprimet e Prishtinës duhet të shihen si veprime të pushtuesve dhe asgjë tjetër”, tha Lista Serbe.
Njoftimi për këtë aksion policor vjen pasi më 26 janar, ministri i Punëve të brendshme të Kosovës, Xhelal Sveçla, tha se autoritetet mbyllën katër komuna paralele serbe që po vepronin jashtëligjshëm në qarkun e Dragashit.
Qeveria e Kosovës ka thënë vazhdimisht se po përpiqet të vendosë rend dhe ligj, posaçërisht në veri të Kosovës të banuar me shumicë serbe, duke i shuar institucionet paralele serbe./REL
