Daniel Brahollari, shoferi që aksidentoi dy netë më parë dy gra në zonën e ish-kënetës në Durrës, është lënë në burg nga Gjykata.
Në dëshminë e tij para organeve policore, Brahollari është shprehur se nuk ishte me shpejtësi të lartë në momentin e aksidentit.
“Isha me shpejtësi 40 km në orë dhe isha mbrapa një mjeti tjetër. Mjeti që kisha përpara në një moment hapet nga e djathta, ndërkohë që dy gratë më dolën përpara duke kaluar me shpejtësi. Mendova se mjeti më hapi krahun për të parakaluar, gratë më dolën papritur dhe nuk kisha fare kohë që të frenoja”- ka thënë ai.
Si pasojë e aksidentit humbën jetën Bukurie Cufaj, 62 vjeç dhe Sabrie Cufaj, 40 vjeç, përkatësisht vjehërr dhe nuse.
Aksidenti I dyfishtë çoi në protestë edhe banorët e zonës të cilët kërkuan siguri më të lartë në rrugën që sipas tyre kishte marrë me dhjetra jetë njerëzish për shkak të mungesës së ndriçmit dhe sinjalistikës.
