Gjykata e Durrësit ka lënë në burg 22 vjeçarin Daniel Brahollarin, I cili dy netë më parë aksidentoi për vdekje dy gra në zonën e ish-Kënetës.
Avokati I tij I kërkoi trupit gjykues një masë më të lehtë për klientin e tij, me arsyetimin që privimi nga liria të mos ndikonte në studimet e tij.
Sipas avokatit, Danieli është një student ekselent dhe për këtë arsye duhej marrë në konsideratë një masë më lehtësuese sigurie.
Vetë Daniel Brahollari tha përpara trupës gjykuese se nuk e di nëse është ai shkaku i vërtetë i vdekjes së dy grave, përkatësisht vjehërr dhe nuse.
Kjo pasi sipas tij mbi trupin e dy grave kaluan edhe makina të tjera, ndërsa vetë ishte me një shpejtësi normale.
“Nuk kisha fushëpamje, pasi përpara, siç thashë, kisha mjetin tjetër që më pengonte. Në momentin që i pashë në mes të rrugës nuk kisha kohë që të frenoja. I përplasa, nuk e di nëse ndërruan jetë si pasojë e kësaj përplasjeje apo nga ndonjë përplasje tjetër. Mbi trupat e tyre kaluan edhe makina të tjera. Në këtë pikë kam dyshime, isha unë shkaktari që ato ndërruan jetë apo ishin makina të tjera. Kërkoj të hetohet thellësisht kjo ngjarje” tha Brahollari, student në Fakultetin e Drejtësisë.
