Një aksident i rëndë ka ndodhur gjatë ditës së sotme në shtetin grek, ku si pasojë kanë humbur jetën dy prindërit e trajnerit Alban Bushi.
Automjeti me të cilin po udhëtonin, Ali dhe Bukurije Bushi, u përplas nga një fugon në rrugën “Egnatia” në aksin Veria-Selanik dhe si pasojë e përplasjes, dy prindërit e trajnerit Alban Bushi ndërruan jetën.
Lajmi është konfirmuar edhe nga Presidenti i FSHF-së, Armando Duka, i cili përmes një postimi i ka shprehur ngushëllimet e tij familjes Bushi.
Postimi i plotë i Armando Dukës:
“Sapo mësova lajmin e dhimbshëm për ndarjen tragjike dhe të parakohshme nga jeta të dy prindërve të jashtëzakonshëm, njerëzve të mirë, Ali dhe Bukurije Bushi, në një aksident në Greqi.
Në këtë moment të vështirë, mendimet e mia shkojnë tek Albani dhe të gjithë anëtarët e tjerë të familjes, që përveç trishtimit për këtë humbje të madhe, do të përballen edhe me mungesën e pamatë të dashurisë prindërore.
Në emrin tim personal dhe të Federatës Shqiptare të Futbollit, ku Albani ka kaluar shumë vite si pjesë e kësaj familjeje të madhe, shpreh ngushëllimet më të sinqerta. Qoftë kujtimi i tyre i paharruar!”
