Një aksident me përmasa tragjike u shënua pasditen e të dielës në rrugën Shkodër-Velipojë. Nga përplasja e kokë më kokë e dy makinave, ka humbur jetën, Edmond Preka 40 vjeç dhe dy fëmijët e tij të mitur, vajza 5 vjeçe dhe djali 9 muajsh. Në gjendje kome është vajza tjetër 10 vjeçe dhe po në gjendje të rëndë, bashkëshortja e tij, Evisa Preka, 37 vjeçe.
Familja Perka udhëtonte me një Alfa Romeo kur u përplas me një fuoristradë ku udhëtonin dy djem që janë jashtë rrezikut për jetën.
Sipas mjekëve të Shkodrës, vajza 10-vjeçare ndodhet në koma, dhe për shkak të gjendjes në të cilën ajo ndodhet, transporti drejt Tiranës për mjekim më të specializuar është i vështirë.
Edmond Preka i njohur ndryshe dhe me emrin Mondi Gjergji, Rajan 9 muajsh dhe Ajsel 5 vjeçe ndërruan jetë në aksidentin rrugor. Mjeti tip ‘Alfa Romeo’ me të cilin po udhëtonte Edmond Preka bashë me bashkëshorten dhe tre fëmijët u përplas me një mjet tip ‘Fuoristradë’, brenda të cilit ishin Sokol Mullia dhe Andrea Gjergji.
Shkak i aksidentit nga të dhënat e para mësohet se ka qenë shpejtësia tej normave dhe mungesa e ndriçimit, pasi rruga është në ndërtim. Por policia ende nuk ka nxjerr fajtorët e këtij aksidenti. Nuk dihet nëse ishte fuoristrada apo Alfa Romeo që shkaktoi perplasjen fatale.
Informacioni paraprak i policisë
Më datë 18.02.2018, rreth ores 18:00, ne aksin rrugor Shkodër –Velipojë ka ndodhur një aksident, me pasoja. Shërbimet e policisë kanë shkuar në vendngjarje ku kanë konstatuar se ishin përplasur mjeti tip Alfa Romeo me targa AA474NJ me drejtues shtetasin E. P 40 vjeç, me mjetin Fuoristradë me targa AA 292 OL me drejtues shtetasin S.M.
Si pasojë e përplasjes ka humbur jetën drejtuesi i mjetit Alfa Romeo shtetasi E.P, djali i tij 9 muajsh R.P dhe vajza A. P. 5 vjeçe.
Po në mjetin Alfa Romeo udhëtonin edhe pjestarët e tjerë të familjes bashkëshortja shtetësja E. P. 36 vjeçe, dhe vajza N. P. 10 vjeçe, të cilat janë dërguar në urgjencën e Spitalit Rajonal Shkodër.
