TIRANE- Dy persona kanë humbur jetën në një aksident të rëndë të ndodhur në orët e vona të mbrëmjes së djeshme në autostradën Tiranë-Durrës.
Sipas policisë, një makinë tip Benz me targa AA 301 AG, ka humbur kontrollin e mjetit dhe ka goditur nga prapa mjetin kamion tip Man me targë koka TR9530P dhe rimorkio TR0881J me drejtues shtetasin Sh.B. 62 vjeç, banues në Tiranë.
Nga përplasja ka ndërruar jetë në Spitalin Rajonal Durrës, E.T. 25 vjeç, banues në Durrës i cili ishte pasagjer në mjetin tip Benz.
Shtetasi Sh.B. ka zbritur nga mjeti i tij për të dhënë parë se çfarë kishte ndodhur, kur një mjet i paidentifikuar e ka goditur. Për pasojë, ai ka ndërruar jetë në Spitalin Rajonal të Durrësit.
Ndërkohë drejtuesi i mjetit tip Benz, Adriatik Bajraktari, ndodhet në Spitalin Ushtarak Tiranë nën kujdesin e mjekëve.
Në aksident janë përfshirë edhe 2 automjete të tjera, të cilët në kushtet e errësirës dhe mungesës së sinjalistikës janë përplasur me mjetet e aksidentuara më herët. Konkretisht, mjeti tip Nisan me targa AA 894 FF, me drejtues shtetasin A.B.28 vjeç, banues në Tiranë, ka goditur nga prapa një mjet BMV X5, i cili ka qenë duke u dhënë ndihmë të aksidentuarve. Policia po punon për zbardhjen e rrethanave dhe shkaqeve të aksidentit të rëndë.
