Radioja, televizioni, interneti dhe mediumet e tjera ishin në fokus të diskutimit nga paneli i të ftuarve në studion e “Rudina” në Tv Klan. Gazetarë e moderatorë ishin të ftuar në programin e kësaj të shtune. Ata treguan pak nga eksperienca e tyre disa vjeçare. Eksperiencat e gjithësecilit ishin të ndryshme, por ato bashkoheshin në një pikë. Të gjithë e kishin nisur nga radioja. Dashuria e tyre e parë ka qenë radioja.
Gazetari dhe spikeri i lajmeve në Klan News, Besard Jacaj tregoi pak nga fillimet e tij në fushën e gazetarisë dhe komunikimit. Edhe pse kanë kaluar vite, ai me nostalgji kujton studion e një radioje lokale në qytetin e Shkodrës. Ishte pikërisht puna e tij e parë dhe siç thotë ai vetë, pavarësisht se sot ka mundësinë që të punojë në studio më të avancuara dhe më moderne, ajo studio e vogël radioje do i falë përherë shumë kujtime.
“Unë punën e parë e kam filluar në radio në vitin 2015-të, në një radio lokale në Shkodër. Jam kthyer pas disa vitesh në studion e radios ku kam punuar vite më parë. Unë tani jam në Klan. Dihet infrastruktura moderne e çdo gjë tjetër, por gjithmonë pavarësisht studiove shumë të mëdha, studiove luksoze që kemi tani, ajo studioja e radios e cila ishte shumë modeste, kijeni parasysh një radio lokale në Shkodër është shumë modeste, ta jepte atë emocionin që nuk ma ka dhënë asnjë studio tjetër deri në këto momente. Ndoshta ndikon fakti që ishte puna e parë, është impakti i parë, por ka një emocion shumë të jashtëzakonshëm”, tha Besard Jacaj.
