Ministri i Shtetit për Rindërtimin, Arben Ahmetaj deklaroi se Shqipëria nuk u godit rëndë nga pandemia, pasi qeveria mori masa për të frenuar përhapjen.
Në fjalën e tij në parlament, Ahmetaj foli edhe për paketat ekonomike, duke shtuar se kryeministri Rama po mendon të fusë në këto paketa edhe familjet që ishin hequr nga ndihma ekonomike.
“Po të ishte situata si në Itali, Zot na ruaj. Por ishte përgjigja e qeverisë, e maxhorancës, edhe e juaja në doni, për të frenuar koronavirusin. Trump dje tha se ka dritë në fund të tunelit. Po, ka dritë në fund të tunelit, sepse kjo qeveri iu përgjigj menjëherë armikut të padukshëm. Qeveria po mendon hapjen graduale, në mënyrë gjeografike.
E drejta e jetës është kryesore dhe ne kemi parasysh jetën në radhë të parë. 52 mijë qytetarë kanë marrë pagën e luftës, 11 mijë të aprovuar janë në paketën e dytë. Po , 4.4 përqind e PPB është ajo që po jepet. Paratë po shkojnë tek qytetarët që kanë më shumë nevojë. Sot kryeministri po shikon që të shtojë pikëzimin, tek ata familje që kanë dalë nga skema për ndihmë ekonomike.”, u shpreh Ahmetaj./Opinion.al
