Një 61-vjeçar me detyrë faturist uji ka rënë në pranga, pasi dyshohet se është i përfshirë në kultivimin e bimëve të kanabisit si dhe për shpërdorim detyre.
Sipas uniformave blu mësohet se në fshatin Bardhorë, u gjetën të kultivuara 530 bimë narkotike kanabis, të cilat u asgjësuan me anë të djegies.
“Në zbatim të masave të përcaktuara në planin operacional kombëtar “Territor i pastër”, për parandalimin, evidentimin dhe goditjen e veprimtarisë kriminale të kultivimit të bimëve narkotike, shërbimet e Komisariatit të Policisë Kavajë kanë intensifikuar kontrollet në terren, duke u bazuar në inteligjencën policore.
Si rezultat i kontrolleve, në fshatin Bardhorë, u gjetën të kultivuara 530 bimë narkotike cannabis sativa, të cilat u asgjësuan me anë të djegies. Nga kontrolli në terren u konstatua se bimët narkotike vaditeshin me një tub që ishte lidhur në mënyrë të paligjshme me linjën e ujit të pishëm.
Në vijim të veprimeve hetimore dhe procedurale për këtë rast, u arrestua shtetasi I. B., 61 vjeç, banues në Rrogozhinë, me detyrë faturist uji, pasi nuk ka raportuar për ndërhyrjen në tubacionet e ujit dhe dyshohet si bashkëpunëtor në kultivimin e bimëve narkotike”, njofton policia.
Gjithashtu vijon puna për kapjen e personave të tjerë që mund të jenë të përfshirë në këtë aktivitet.
Materialet procedurale i kaluan Prokurorisë, për veprime të mëtejshme.
