Ministrja e Infrastrukturës dhe Energjisë, Belinda Balluku, ka paralajmëruar sërish bizneset që veprojnë përgjatë rrugëve kombëtare të lirojnë hapësirat e zëna në mënyrë të paligjshme deri më 31 korrik.
Aksioni vjen si pjesë e një reforme më të gjerë për rikthimin e rendit dhe ligjshmërisë në territorin shqiptar.
“Jemi sërish në terren për reformën e rikthimit të ligjshmërisë në territorin e Shqipërisë, sa i përket edhe sigurisë rrugore dhe hapësirës publike që duhet liruar tashmë. Siç kemi informuar një javë më parë, u kemi bërë thirrje të gjitha bizneseve që ndodhen në zonat e akseve kombëtare të marrin masa dhe të lirojnë hapësirat.
Sidomos te varrezat e automjeteve, që sipas një akti normativ të vitit 2011, duhet të jenë 1 km larg rrugës kombëtare,” deklaroi Balluku gjatë inspektimeve në aksin Kamëz-Laç.
Ajo theksoi se ky afat është përfundimtar, duke shtuar se së fundmi shumë subjekte i janë përgjigjur pozitivisht apelit të qeverisë.
“Do të jemi të kujdesshëm edhe me shtëpitë që nuk kanë zbatuar rregullin për t’u vendosur larg nga autostrada,” deklaroi Balluku, duke bërë me dije se ndërhyrjet nuk do të kursejnë askënd.
Ajo e quajti këtë një “reformë të thellë që ka nisur kudo, nga tendat, parkingjet e deri te akset kombëtare të shtrira nga veriu në jug.”
“Kjo reformë do shkojë deri në fund, duke liruar çdo centimetër hapësirë,” u shpreh ministrja, duke kërkuar edhe bashkëpunimin e qytetarëve në këtë nismë.
”Në shumicën e rasteve denoncimet e tyre janë të sakta dhe të drejta,” përfundoi ajo./tvklan
