Pas rishikimit të marrëveshjes koncensionare me gjermanët e TIA-s, i është hapur rruga funksionalizimit të aeroportit të dytë civil në Shqipëri, atij të Kuësit.
Ende nuk ka një emër të zyrtarizuar për investitorin që do ta marrë përsipër menaxhimin e aeroportit, por bëhet me dije se të paktën dy kompani të huaja kanë shprehur interes, Ryan Air dhe Wizz Air.
“Ne po presim ofertat nga investitorët që duan ta marrin në menaxhim. Një ofertë ka ardhur nga kompania hungareze Wizz Air, e cila përpos kërkesës së shkruar ka bërë edhe inspektimin e aeroportit gjatë këtyre ditëve. Por, jemi të hapur edhe për oferta të tjera, deri sa të vendosim përfundimisht për të”, shprehen burime nga Ministria e Transporteve.
Aeroporti i Kukësit “Zayed bin Sultan Al Nahyan” është aeroporti i dytë civil në Shqipëri. Ai mban emrin e ish-emirit (mbretit) Sheh Zayed bin Sultan bin Zayed Al Nahyan të Emirateve të Bashkuara Arabe.
Ndërtimi i këtij aeroporti nisi në muajin maj të vitit 2002. Ky aeroport shtrihet në një sipërfaqe prej rreth 65 hektarë, 3 kilometra larg qytetit të Kukësit, dhe është i kategorisë ndërkombëtare C. Sipas projektit të ndërtimit, në këtë aeroport është parashikuar që të zbresin njëherësh deri 5 aeroplanë. Aeroporti është i pajisur me të gjitha mjetet e kontrollit të hapësirës ajrore.
