Sekretari amerikan i Mbrojtjes, Pete Hegseth, njoftoi të premten masa të reja për gazetarët që të shoqërohen me eskortë zyrtare brenda pjesës më të madhe të ndërtesës së Pentagonit. Ky vendim është pjesë e disa masave kufizimesh ndaj medias nga administrata Trump.
Masat, të cilat hyjnë në fuqi menjëherë, ndalojnë gazetarët me akreditim të hyjnë në pjesën më të madhe të selisë së Departamentit të Mbrojtjes pa miratimin dhe shoqërimin zyrtar.
Në një memorandum, Hegseth theksoi se ndërsa Departamenti mbetet i përkushtuar ndaj transparencës, është “po aq i detyruar të mbrojë informacionin e klasifikuar dhe të ndjeshëm, zbulimi i paautorizuar i të cilit mund të rrezikojë jetën e ushtarakëve amerikanë”.
Agjencia e lajmeve Reuters raporton se Shoqata e Gazetarëve të Pentagonit, që përfaqëson interesat e mediave që mbulojnë ushtrinë amerikane, e cilësoi këtë vendim si “një sulm të drejtpërdrejtë ndaj lirisë së shtypit”.
Ata argumentuan se gjatë dekadave të fundit, pavarësisht nga administratat republikane dhe demokrate, gazetarët kanë pasur qasje në hapësira jo të klasifikuara në Pentagon, madje edhe pas sulmeve të 11 shtatorit 2001, pa pasur probleme për sigurinë operative.
Në reagim, zëdhënësi i Pentagonit Sean Parnell tha se “këto masa të reja janë të nevojshme për të mbrojtur informacionin e ndjeshëm dhe për të siguruar mbrojtjen e ushtarakëve amerikanë nga rreziqe të parandalueshme”.
Që nga rikthimi i Trump në pushtet në janar, Pentagoni ka nisur hetime mbi rrjedhje informacioni, ku tre zyrtarë janë vendosur në pushim administrativ.
Po ashtu, disa media tradicionale si New York Times, Washington Post, CNN dhe NBC janë detyruar të lënë hapësirat e tyre në Pentagon, në mënyrë që t’i hapin vendet për mediat më miqësore ndaj administratës Trump, si New York Post, Breitbart dhe One America News Network.
Administrata Trump ka përdorur edhe teste me poligraf për hetimin e rrjedhjeve të informacionit, duke kërcënuar me shkarkim disa zyrtarë që i refuzojnë ato. Shtëpia e Bardhë deklaron se nuk do të tolerojë rrjedhjet e informacionit dhe se punonjësit federalë duhet të mbajnë përgjegjësi për këtë.
Memorandumi i Hegseth paralajmëron gjithashtu masa të tjera sigurie dhe kontroll më të rreptë në dhënien e akreditimeve në të ardhmen.
