Organizimi i lotarisë tatimore nga ana e Ministrisë së Finacave nisi si një formë për nxitjen e blerësve në marrjen e kuponit tatimor duke ndjekur eksperiencën e vendeve të rajonit. Por me sa duket, jo vetëm që nuk po e nxit luftën ndaj evazionit, por po e motivon atë edhe më shumë.
Për këtë mediat i referohen hedhjes së lotarisë, e planifikuar për datën 15 janar, e cila ka ngritur pikëpyetje të mëdha.
Individët nxituan të mblidhnin kuponat dhe t’i dërgonin ato me postë, sipas procedurës së përcaktuar nga Ministria e Financave http://ëëë.llotariashqiptare.al/dergimi.html.
Deri në 11 janar, ditën e fundit kur pranoheshin zarfat, radha ishte e gjatë në zyrat postare me individët që shpresonin deri në momentin e fundit që do të fitonin.
Ndërsa në 15 Janar, media raportoi që ndryshe nga sa ishte deklaruar, hedhja e lotarisë nuk ishte direkte, por e regjistruar. Nga Ministria e Financave nuk ka ende koment zyrtar për këtë.
Edhe nëse sheh listën e fituesve, çuditë janë të shumta. Ka fitues me dy kupona, kur numri minimal i kuponave që duhet të kishe për t’u bërë pjesë e lotarisë ishin 50. Një tjetër ka fituar me 35 kupona.
Por, në përpjekje për të luftuar evazionin, Ministria e Financave është kthyer dashur pa dashur në një nxitës të saj. Fituesi i parë i kategorisë së tretë kishte dorëzuar 54 fatura me vlerë 22.2 milionë lekë, që me një llogari të thjeshtë rezulton se vlera mesatare e një fature është rreth 411 mijë lekë, kur kufiri maksimal i transaksioneve cash është 150 mijë lekë (mbi këtë shumë pagesa është e detyrueshme të bëhet me bankë). Edhe aritmetikisht, të paktën një faturë ka qenë mbi shumën prej 150 mijë lekësh.
Edhe fituesi i dytë i të njëjtës kategori, kishte 106 fatura për 15.4 milionë lekë, me një vlerë mesatare faturash prej 146 mijë lekësh, shumë afër limitit maksimal të lejuar të transaksioneve cash, shkruan monitor.al.
Pritet transparence nga Ministria e Financave, si për organizimin e lotarisë, ashtu dhe të dhënat për numrat e kuponave dhe shumën e transaksioneve të fituesve.
Marrë nga Monitor.al
