Me kërkesë të Prokurorisë së Durrësit, gjykata ka vendosur masën ndaluese “pezullim nga detyra” për drejtoreshën e spitalit të këtij qyteti. Ardjola Frashëri është e dyshuar për veprat penale të shpërdorimit të detyrës dhe shkeljen e barazisë në tendera.
Hetimi per Frashërin ka nisur pas një kallëzimi të bërë nga kontrolli i lartë i shtetit.
Ky institucion pas një auditimi të kryer në spitalin e qytetit bregdetar për periudhen 2013 – 2015 ka konstatuar se në 23 raste drejtoresha dhe ish -drejtori Taulant Baku edhe ky nën hetim, kanë kryer tendera pa njoftim paraprak.
Në bazë të ligjit “Për prokurimin publik”, kjo procedurë aplikohet vetëm në raste emergjente. Dëmi i shkaktuar sipas KLSH-së është rreth 70 milionë lekë. Por prokuroria do të kryejë një rillogaritje pasi ka dyshime se vlera e abuzimeve është më e madhe.
Nga hetimi janë konstatuar shkelje të rënda në blerjen e naftës, shërbim kateringu, riparim pavionesh, si edhe për blerje medikamentesh dhe materialesh mjekësore. Hetimet perfshijnë edhe ish – drejtorin Taulant Baku.
Tv Klan
