Gjykata e Apelit të Durrësit ka liruar sot nga qelitë e paraburgimit 14 nga 18 personat e arrestuar për abuzimet me pronat në Durrës.
18 policët dhe zyrtarët të cilët ishin ndaluar në funksion të hetimeve për dëmet e shkaktuara nga tërmeti i 26 nëntorit, dolën sot para Apelit të Durrësit, i cili është zhvendosur në Kavajë për shkak të dëmeve të godinës nga tërmeti, për tu njohur me masat e sigurisë.
Gjykata vendosi të lërë në qeli Dëshir Dakolin me detyrë ndihmës specialist/SPZ, në Komisariatin e Policisë Durrës; Haxhi Sherrën, ndihmës specialist Komisariati Shijak; Ermal Petovën (OPGj Manzë); Agim Osmanin, ndihmës specialist policia Durrës ndërsa Gani Dama-polic patrulle është ende në kërkim.
Ndër personat që u lanë të lirë ishin dhe 4 zyrtarët Petrit Neziri, ndihmës specialist policia Manzë; Ndricim Shika, ndihmës specialist policia Shijak; Adem Lika, ndërtues dhe Gjergji Gerco, sekretar njësisë administrative Sukth.
Këta persona u arrestuan fillimisht nga policia pasi akuzohen se kanë krijuar një mekanizëm korruptim nëpërmjet të cilit përfitonin 1500 deri në 7000 euro nga abuzimet me lejet e ndërtimeve.
Sipas dosjes së hetimeve ata shmangnin zbatimin e legjislacionit në fushën urbanistike dhe sigurimit teknik të tyre.
Akuzat e tjera që bien mbi ta kanë të bëjnë me falsifikim dokumentesh, mos raportim të ngjarjeve kriminale, dhe fshehje të kallëzimeve të bëra nga qytetarë të ndryshëm për abuzimet që po ndodhnin në këto zona me ndërtimet pa leje. /Opinion.al
