Një ditë pasi zyrtarja e lartë e SHBA, Victoria Nuland vizitoi Tiranën dhe tha se në tryezën e partive politike ndodhet një draft i ri për reformën në drejtësi, PS, PD, LSI po heshtin. Asnjë reagim, as pro as kundra.
Ende nuk dihet qartë se çfarë përmban ky draft pasi askush nuk e ka publikuar, por gazetarët përmes burimeve kanë mësuar disa detaje. Kështu mësohet se propozimi i ri i SHBA-ve ka të bëjë me formulën e përzgjedhjes së kandidatëve për ‘vettingun’.
Parashikohet që ndërkombëtarët të monitorojnë përzgjedhjen e gjyqtarëve dhe prokurorëve duke pasur të drejtë të s’kualifikojnë kandidaturat që nuk u pëlqejnë.
Pra gjyqtarët dhe prokurorët që do të jenë në përbërje të institucioneve të Vetingut (Këshillit të Lartë të Gjyqësorit KLGJ), (Këshillit të Lartë të Prokurorisë KLP), (Komisionit të Pavarur të Kualifikimit KPK) dhe (Kolegjit të Pavarur të Kualifikimit KPK) mund të s’kualifikohen nga Përfaqësuesit e Operacionit Ndërkombëtar të Monitorimit.
