Nëse ka diçka të sinqertë në artikulimet politike të PD, është padyshim fakti që as Edi Rama dhe as Ilir Meta nuk e duan reformën në drejtësi! Kjo nuk ka nevojë për një analizë më të gjerë. Asnjë politikan shqiptar, dhe asnjë protagonist zullumesh 20 vjeçare nuk do t’i ofrohej me dorën e tij një hetimi ku peshën më të madhe e zënë ndërkombëtarët dhe ku ata janë thuajse pjesë ekzekutuese e drejtësisë. Përtej replikave dhe betimeve mbi sovranitetin e vendit dhe ruajtjen e tij, klasa politike shqiptare është e shqetësuar nga precedenti i Kosovës apo Rumanisë, precedent që në Shqipëri, në kushtet dhe në ngjarjet tona mund të provokonte shumë më tepër ndëshkime.
Por nëse e gjithë klasa politike nuk është e predispozuar për të kaluar reformën sipas modelit që propozojnë ndërkombëtarët, duket se koston më të madhe po e merr PD. Për një gabim taktik që në nisje, PD po shkon nga propozimi në propozim, ndërkohë që mund të kishte mbajtur një qëndrim koherent, duke sqaruar që në fillim se ajo ishte vetëm për një reformë ku ishte edhe vetë pjesë dhe ku ndërkombëtarët kanë thjeshtë rol konsultativ. Ndërkohë, nuk ka asnjë sekret, të thuhet se forca më kundërshtuese ndaj reformës është LSI. Ajo që bën përshtypje është se LSI po fshihet pas qëndrimeve të PD. Duke besuar se PD nuk do e kalojë këtë reformë, LSI po deklarohet në favor, madje në çdo dalje publike po flet pro reformës, pa bërë asnjë koment mbi tekstin. Edhe pse ka vërejtjet kryesore ndaj saj. Ajo po artikulon thjeshtë nevojën e konsensusit të gjerë, që është i drejtë, por që sërish e kalon topin në fushën e PD. Pra sipas LSI, nëse PD e kalon reformën edhe ajo është gati ta bëjë këtë gjë.
PD duhet të sqarojë që ky qëndrim i saj është thjeshtë parimor dhe nuk ka lidhje me LSI. Eshtë e padrejtë që PD të përballet me ndërkombëtarët, pra të mbajë mbi shpinë edhe zemërimin e tyre kur do ketë më shumë nevojë se çdo forcë tjetër për një aleancë me ta. Në zgjedhjet lokale ishin pikërisht ndërkombëtarët që qëndruan fort ndaj presionit dhe dhunës së vetë LSI në Lezhë apo Vorë. Nuk është çudi që PS dhe LSI të ripërsërisin taktikat e tyre të lidhjes me të fortë dhe më banditë për të rifituar zgjedhjet. Të aktivizimit të kriminelëve dhe të biznesmenëve për të marrë forcërisht apo për të vjedhur vota. Në këtë rast, PD sërish duhet t’i drejtohet ndërkombëtarëve sepse në vend, zgjidhja e këtij problemi me institucionet që kemi është thuajse i pamundur. Përpara se sa t’i drejtohen PD, ndërkombëtarët duhet të kenë informacion mbi votat e mazhorancës. Sa janë ato? Ka qëndrime të ndryshme brenda saj? Dhe a ka sot në PS minimalisht një grup deputetësh që janë kundër reformës? Sepse me gjasë, priten edhe brenda saj, zhvillime befasuese.
Opinion.al
