Grabitja e miliona eurove që ndodhi në mesditën e djeshme në aeroportin e Rinasit, ka ngritur dyshime të rënda për bashkëpunim mes koncesionarit të aeroportit TIA, dy kompanive të saj të sigurisë ICTS, Nazeri 2000 dhe Raiffeisen Bank.
Koncesionari që menaxhon aeroportin dhe sigurinë në të, bashkë me dy kompanitë e përzgjedhura për sigurinë nga vetë ai, a duhet të jenë nën akuzë për një grabitje të tillë?
Pasi dy kompanitë e aeroportit kanë dështuar të mbrojnë hyrje-daljet në aeroport.
Kompania Nazeri shpk e angazhuar në mbrojtjen e perimetrit të jashtëm të aeroportit por edhe në transportin e parave përmes mjeteve të blinduara, është tanimë nën dyshimin e fortë të përfshirjes në këtë histori të rëndë kriminale.
Por, çfarë e lidh me këtë histori Raiffesien Bank?
Lidhja e parë, është heshtja totale e një banke e cila deri në këto çaste nuk ka thënë shumën e saktë të grabitur në pistën e aeroportit të Rinasit. Nuk ka ende një deklaratë të bërë publike për mediat dhe opinionin publik.
Së dyti, arsyeja e mbajtjes fshehur të shumës së vjedhur, e cila tashmë dihet nga i madh dhe i vogël në këtë vend, se nuk është aq sa policia e bëri publike paraditen e sotme.
Pse ka kaq shumë vlerë shuma e parave?
Ka vlerë se një shumë kaq marramendëse në valut, përcakton edhe nivelin e sigurisë të transportimit nga banka deri në aeroport.
Pikërisht, kjo fshehje e shumës së grabitur, e disa detaje të tjera të lartpërmendura kanë hedh dyshime serioze për përfshirje të të gjitha këtyre hallkave me njëra-tjetrën për të realizuar një nga grabitjet më spektakolare të të gjitha kohërave në Shqipëri.
Pse jo, duke hapur rrugën e një prej skandaleve më të mëdha, që jo vetëm nxori një shtet qesharak dhe shumë të dobët, por edhe i gatshëm për t’u shitur sa më lirë të jetë i mundur.
