Në emisionin “Opinion”, kandidati i PS për bashkinë e Tiranës, Erion Veliaj ka folur dhe për artistët e njohur të cilët kanë shprehur mbështetjen e tyre për të.
Veliaj tha se ata nuk janë paguar, pasi shumicën prej tyre i njeh personalisht dhe se gjatë kohës që ka drejtuar bashkinë e kryeqytetit i ka mbështetur artistët.
“Ka ardhur spontanisht. Shumë prej miqve kanë thënë a mund të prodhojmë një minivideo. E filluan disa të parë që e nisën. Pjesa më e madhe e kanë çuar vetë, ose kanë bërë një mbjellje, kanë thënë diçka. Jo aspak. Bashkia e Tiranës i ka mbështetur të gjithë. Nëse do të dish ekzaktësisht më shumë ka mbështetur ata që sot mbështesin opozitën. Pra Eugent Bushpepa dhe Renis Gjoka kanë qenë të mbështetur nga Bashkia e Tiranës, ndoshta dhe më shumë. Fakti që mua nuk më shqetëson është që të gjithë janë mbështetur për çdo projekt. Unë nuk di të kem refuzuar një propozim në Bashkinë e Tiranës për të mos e mbështetur. Fakti që disa njerëz janë mirënjohës, ndërsa disa indiferentë, fakti që disa njerëz thonë ‘hej unë e kam edhe një feeling personal’. Unë me Alban Skënderaj njihem prej 20 vitesh”, tha Veliaj./ Opinion.al
