Takimi i djeshëm mes Pandeli Majkos dhe Lulzim Bashës vazhdon të ngjallë kuriozitet dhe media ka mësuar përtej asaj deklarate që bëri Basha.
Ishte thjesht një takim për Asamblenë e NATO-s? Burimet thonë se Jo. Ka shumë gjasa që Pandeli Majko që bëri ftesën ti ketë kërkuar Bashës mbështetje politike. Pandeli Majko e konsideron veten si kandidat potencial i të majtës për President të Republikës vitin e ardhshëm.
Kështu në kulmin e debatit politik, kur opozita akuzon Kryeministrin Rama për përgjime telefonike të politikanëve dhe diplomatëve të huaj, të lidhjeve së tij me Klement Balilin për trafikun e drogës, por dhe me Emiljano Shullazin, Majko zhvillon një takim publik me kreun e opozitës, duke treguar se është një bashkëbisedues pa komplekse dhe me kundërshtarin politik të partisë së tij.
Si një politikan me tone pajtuese, Majko është në pritje të një propozimi nga Kryeministri Rama për postin e Presidentit, duke e konsideruar edhe LSInë e Ilir Metës mbështetëse të tij, me të cilin kanë nisur rrugëtimin politik në forumin rinor eurosocialist.
Por edhe kreu i opozitës, Lulzim Basha, nuk e ka refuzuar takimin në publik me Majkon, duke treguar edhe ai nga ana e tij se është një bashkëbisedues konstruktiv me eksponentë të Partisë Socialiste të papërfolur për afera pushteti, edhe për faktin se Majko ka preferuar të mbetet deputet dhe jo pjesë e kabinetit qeveritar.
