Teksa Gjykata e Tiranës ka përcaktuar administratorin e përkohshëm në kompaninë e prodhimit të hekurit ‘Kurum’ për te verifikuar nëse kërkesa për faliment e kompanisë qëndron, bankat nga ana tjetër kanë vërshuar në QKR për bllokimin e asetëve të kompanisë për kreditë e pakthyera.
Shoqëria përmbarimore EPSA pak ditë më parë kërkoi në QKR bllokimin e kuotave/aksioneve dhe te drejtave qe rrjedhin nga zotërimi i kuotave për debitorin shoqëria “Kurum International” për llogari të bankës Pro Credit ndaj së cilës pretendohet se Kurum ka një kredi të pakthyer.
Nga ana tjetër gjykata vendosi të zëvendësojë administratorin e ‘Kurum’ Yusuf Sezai me Lindita Kikinon një administratore e përkohshme deri sa gjykata të vendosë ose jo për falimentin e kompanisë. Zonja Kinkino është ngarkuar nga gjykata me disa detyra nga të cilat, të verifikojë nëse kziston mundësia për vazhdimësinë e veprimtarisë së debitorit.
Kikino duhet të hetojë dhe të paraqesë para Gjykatës informacion inanciar në lidhje me debitorin dhe të verifikojë dhe të raportojë nëse është e nevojshme të merren masa të mëtejshme për sigurimin e pasurisë së luajtshme dhe të paluajtshme dhe likuiditetet.
Administratorja e re do të mbikëqyrë veprimtarinë e debitorit deri në marrjen e një vendimi nga Gjykata për hapjen, ose jo të procedurës së falimentimit. Sipas vendimit të gjykatës çdo disponim i pasurisë së debitorit ‘Kurum’ do të kryhet vetëm me miratimin përfundimtarë të administrimit të përkohshëm.
Debitorët e Kurum detyrohen të lejojë administratorin e përkohshëm të inspektojë librat e llogarive dhe ti japë atij të gjitha informacionin e nevojshëm.
Gjithashtu gjykata urdhëron të gjitha pezullimet e ekzekutimit të veprimeve përmbarimore. “Pezullohen veprimet përmbarimore që kryhen nga shoqëria Përmbarimore “ TDR GROUP”, me përmbarues Gjyqësor privat Florian Shehu, për ekzekutimin e urdhrit të ekzekutimit nr.1766 Akti, datë 09.03.2016, të Gjykatës së Rrethit Gjyqësor, Tiranë, me kreditor “ Banka NBG Albania”. Çdo debitor i Kurum, detyrohet të përmbushë detyrimet përkatëse ndaj kësaj shoqërie në përputhje me dispozitat ligjore në fuqi”, thuhet në vendimin e gjyaktës.
Kurum, eksportuesi i dytë më i madhi në vend, shpalli falimentin për qëllim ristrukturimi në shkurt të këtij viti. Vlerësohet që kompania ka mbi 300 milionë dollarë detyrime, gjysma e të cilit është ndaj bankave dhe institucioneve financiare ndërkombëtare. /monitor
