Ish-kryeministri Sali Berisha, në konferencën për mediat u pyet nga gazetarët nëse ai e kishte plotësuar pyetësorin me 12 pyetje të Këshillimit Kombëtar.
Berisha u shpreh se ai ishte procesi me qesharak dhe antiligjor.
“Mund t’ju them se është procesi më qesharak, më antiligjor, që ka ndodhur ndonjë herë në fushë. Së pari e denoncova edhe në parlament se Agjencia e Këshillimit në mënyrë të kundraligjshme tërësisht, por edhe shkatërruese ka angazhuar pa autorizim të parlamentit INSTAT-in. INSTAT-i është institucion që varet direkt nga parlamenti. Nuk mund të prodhojë statistika për asnjë të tretë pa miratimin e parlamentit. INSTAT-i në këtë rast ka përpunuar statistika të qeverisë shqiptare. Në Shqipëri statistikat i prodhojnë 3 institucione: Ministria e Financave, Banka e Shtetit dhe INSTAT. Askush tjetër. Edi Rama për të rrënuar INSTAT krijoi Agjencinë e Mashtrimit Kombëtar. Ato në tërësi janë plotësuar në zyrat e PS dhe shprehin falsitetin e realitetit. Kjo dihej. Nuk kishte ndonjë gjë të madhe. Keqardhja është sepse ka nxirë INSTAT. INSTAT është partneri i mirëbesimit i Eurostat. Me këtë akt që ka kryer INSTAT ka mundësi që Eurostat të mbajë qëndrime të dëmshme për Shqipërinë”,-u shpreh Berisha.
