Në një konferencë për mediat të zhvilluar këtë të enjte, kreu i Partisë së Lirisë, Ilir Meta është pyetur nga gazetarët nëse është i shqetësuar se mund të ketë fatin e Sali Berishës, të cilit iu hoq imuniteti ditën e sotme.
Meta theksoi se në rastin e ish-kryeministrit u përdorën standarde të dyfishta, ndersa theksoi se Berisha ka kundërshtuar rrugën që është ndjekur në çështjen ndaj tij.
Ai tha ndër të tjera se miti i të paprekshmëve për të është përrallë.
“Edhe Berisha ka qenë i hapur të bashkëpunojë me drejtësinë, ka kontestuar rrugën e ndjekur në mbrojtje të parimeve Kushtetuese dhe garancive që Kushtetuta i jep Parlamentit. Janë aplikuar standarde të dyfishta, nuk është deputet i zakonshëm por lider i forcës kryesore opozitare.
S’kam pasur asnjëherë një shqetësim i tillë, miti i të paprekshmëve për mua është përrallë.
Nëse flasim për paprekshmëri shohim nga njëra një përshkallëzim të masave të sigurisë për një çështje të kontestuar për mungesë provash, por kemi edhe firmat e kryetarit të bashkisë që ka rrëmbyer kompetencat e këshillave bashkiakë të qarkut të Tiranës për çështjen e inceneratorit. Gjithashtu edhe për kryeministrin, situata është e qartë”, tha Meta.
