TIRANE- Kryeministri Edi Rama vazhdon prej më se dy orësh në konferencën e fundvitit dhe aktualisht po u përgjigjet pyetjeve të gazetarëve. Pyetjes së TV Klan për rimandatimin e Llallës ai iu përgjigj kështu:
A do t’i jepni një mandat 9vjeçar Prokurorit të Përgjithshëm apo do të zgjidhet një Prokurori i ri, me vënien në zbatim të reformës në drejtësi?
Reforma në drejtësi, është reforma kryefjalë e mandatit tonë, dhe është me një peshë shumë të madhe. Nëse nuk e prodhon këtë tërmet sistemi i drejtësisë, nuk është kryefjala e duhur. Ne kemi qenë të vetëdijshëm që në fillim për rëndësinë e kësaj reforme. Të gjithë aktorët kanë qenë të përfshirë në këtë proces. Edhe ekspertiza e ndërkombëtarëve ka qenë me shumë rëndësi. Politika nuk është e përfshirë në këtë proces qëllimisht. Unë nuk e kam lexuar draftin e reformës. Nuk jam në dijeni qëllimisht, sepse unë kam qenë i bindur se nëse në këtë proces do të hyj unë, bashkëkryetari, apo grupet parlamentare, vetëm do pengojmë. Jo nga mungesa e vullnetit, por nga pamundësia për të dhënë atë që duhet. Nuk ka konsensus politik të mundshëm për këtë reformë, përveçse duke vendosur në distancë se çelësin e konsensusit na e jep Komisioni i Venecias.
