TIRANE- Partia Demokratike duket se nuk ka vendosur të kthehet në parlament. Ajo kërkon sinjale nga mazhoranca. Në mbyllje të mbledhjes së grupit parlamentar, kreu i grupit, Edi Paloka tha se “ nuk ka asnjë reflektim nga shumica për kushtet e opozitës”.
“Javën e kaluar pati votim për deputetin Kokëdhima, por nuk u votua kërkesa jonë për deputetin Suli që do votohet nesër, shpresojmë që maxhoranca të veprojë në përputhje me kushtetuesen, për ta cuar aty kërkesën; kemi kërkesë edhe për Leskajn, që pritet të diskutohet nga këshilli i Mandateve e pastaj në Kushtetuese, gjithashtu amendamentet janë në pritje për diskutim te Ligjet dhe seancë” tha ai.
Ai akuzon kryeministrin Rama se po bën të kundërtën e asaj që kërkohet, duke thënë se kriminelët që po i nxjerr nga dritarja po i fut prapë nga dera.
Sa për Byronë e Hetimit, Paloka theksoi se ajo Byroja duhet të ishte zgjidhur, sipas Venecias të kalojë në kuvend. “Ne nuk kemi kushte për këtë, shumica të zbatojë vetëm ligjet” tha ai.
