Ministri i Brendshëm, Fatmir Xhafaj ka refuzuar të thotë nëse ministria e tij ka informacione për përgatitjen e veprimeve të dhunshme për protestën që Partia Demokratike do të zhvillojë më 13 maj në Tiranë.
“Kjo është një çështje që mbetet për tu parë”, tha Xhafaj, gjatë një prononcimi për gazetarët në Shkodër. Ai ishte në Shkodër së bashku me ministrin e Drejtësisë Petrit Vasili dhe Kryetari i Gjykatës së Lartë Xhezair Zaganjori për inaugurimin e Gjykatës së Apelit, Shkodër.
Lidhur me zgjedhjet e ardhshme, Xhafaj tha se “zgjedhjet e 18 qershorit janë absolutisht të garantuara sepse zgjedhjet i garanton kushtetuta i garanton ligji dhe policia është në funksion të garantimit të kushtetutës dhe ligjit. Policia thjeshtë dhe vetëm bën detyrat që i ngarkon ligji. “
I pyetur nëse ndryshimet në polici kanë lidhje me zgjedhjet ose me luftën kundër kanabisit, Xhafaj tha se çdo ndryshim në polici bën mirë për t’i dhënë ritëm punës. “Në kohë të ndryshme ka prioritetet të ndryshme, natyrisht edhe kanabisi është një prioritet. Dhe në Shkodër për hir të së vërtetës është një prioritet i rëndësishëm për shkak se në vite, zona të caktuara mund t’i konsideroj edhe si Lazarati i kanabisit. Në vite të tëra, ndërkohë që flitej për Lazaratin, shpesh herë harronim se kishim Lazarat edhe në Shkodër.”
