Kryeministri I Kosovës, Albin Kurti, në konferencën e sotme për mediat u pyet nga gazetarët se a do të ketë një shkëmbim të 3 policëve të rrëmbyer me kriminelin serb të arrestuar për sulmet ndaj KFOR, Milun Milenkovic- Llune.
Kurti reagoi ashpër dhe tha se nuk e beson që kjo do të ndodhte. Ai theksoi se në Kosovë sundon ligji dhe se nuk ka favore.
“3 policët që janë rrëmbyer nga Kobra dhe SAI kanë qenë në një rrugë që dikur ishte ilegale dhe janë të angazhuar kundër kontrabandës. Llune nuk u bë kriminel më 26 dhe 29 maj, por ka dosje të trashë me shkelje të ligjit. E vërtetë që arrestimi i Llunes ka shkaktuar panik te kriminelët. Nuk e besonin që kjo do të ndodhte. Te ne ka sundim ligji, nuk bëjmë favore. Nuk e di nëse Beogradi ka kërkuar ndonjë shkëmbim. Për çfarë shkëmbimi jeni duke folur. Ne jemi vend demokratik dhe i lirë”, tha Kurti.
