Mbështetësit e Partisë Demokratike u grumbulluan në bulevardin “Zogu i Parë”, për të protestuar kundër zgjedhjeve të 11 majit.
Në protestë, përveç mbështetësve demokratë, u shfaqën eksponentë të Partisë Demokratike, si Flamur Noka, Gazment Bardhi, Agron Gjekmakaj, Klevis Balliu, Belind Këlliçi, Jorida Tabaku.
Për mediat, Flamur Noka deklaroi se opozita nuk mund të pranojë atë që e quajti tjetërsim të votës së shqiptarëve.
“Patronazhimi, përdorimi i administratës dhe bandave kriminale ishin ato që ndikuan në tjetërsimin e votës së shqiptarëve. Kjo nuk mund të pranohet kurrën e kurrës. Faktori ndërkombëtar e vuri gishtin mbi plagë. 750 000 pensionistëve iu ble vota me 100 euro. Falja e 150 000 gjobave dy ditë para zgjedhjeve, blerje vote është”, tha Noka.
Ndërsa, kur u pyet nëse zoti Sali Berisha do të japë dorëheqjen nga posti i kryetarit të Partisë Demokratike pas humbjes së zgjedhjeve, Noka u përgjigj:
“Për të gjithë ju që merrni instruksione te Fuga, kam një përgjigje: Statuti është zbatuar dhe do të zbatohet nga Partia Demokratike me përpikmërinë më të madhe. Në momentin që në Shqipëri të ketë zgjedhje të lira, çdokush brenda nesh do të mbajë përgjegjësi”.
