Detaje të reja janë zbuluar nga atentati që mbeti në tentativë të shtunën në mbrëmje në Elbasan. Mësohet se shënjestër e atentatit të dështuar ishte Elton Kila, i njohur ndryshe edhe si Oti i Elbasanit.
Sipas Panorama TV, dy autorët kishin planifikuar ta qëllonin atë brenda në automjet. Në momentin kur ishte parashikuar të kryhej atentati, Kila ka qenë duke udhëtuar nga Tirana drejt Elbasanit ndërkohë që në automjet ndodhej bashkë me fëmijët.
Por, kur dy autorët kanë konstatuar prezencë të forcave të policisë në zonë, janë larguar duke lënë automjetin pranë stadiumit “Elbasan Arena”.
Njëri nga dy të arrestuarit, Arsen Preçi ka hedhur në koshin e mbeturinave çantën e supit brenda të cilës janë gjetur pistoleta dhe dy mjete identifikuese që kanë çuar policinë drejt zbulimit të autorëve. Po ashtu në çantë janë gjetur edhe maska dhe doreza që do të përdoreshin prej tyre për të humbur gjurmë pas krimit.
Ndërkaq, i arrestuari tjetër është Arben Spahiu, kunati i Erion Alibejt.
