Të paktën 155 persona janë lënduar pasi dy trena u përplasën në periferi të Barcelonës, thanë shërbimet e urgjencës.
Përplasja, e cila ndodhi rreth orës 07:50 (06:50 GMT), ndodhi në një stacion në rajonin verilindor të Katalonjës të Spanjës.
Mediat lokale raportuan se trenat po udhëtonin në të njëjtin drejtim dhe u përplasën ndërsa njëri ishte i parkuar në stacion. Është e paqartë se si ka ndodhur aksidenti dhe zyrtarët ende nuk kanë komentuar për shkakun e ngjarjes.
Zyrtarët e urgjencës shkruan në Twitter se përplasja ndodhi në stacionin Montcada i Reixac – Manresa, rreth 12 km (7 milje) nga qendra e qytetit.
Duke shkruar në Twitter, ata bënë me dije se 150 persona kishin marrë lëndime të lehta dhe pesë të tjerë ishin “në një gjendje pak më të rëndë”. Ata shtuan se tre persona janë dërguar në spital.
Trafiku i trenave u ndërpre për një kohë të shkurtër në disa linja për shkak të aksidentit, tha qeveria rajonale.
Duke përshkruar momentin e përplasjes, një pasagjere i tha gazetës Ser Catalunya se kishte përjetuar “një goditje të jashtëzakonshme” dhe se “njerëzit po bërtisnin”.
Ministrja spanjolle e Transportit Raquel Sánchez tha se ajo po monitoronte nga afër situatën dhe u uroi “shërim të shpejtë” të plagosurve.
