Presidenti rus Vladimir Putin pas shpërthimit në urën hekurudhore të ngushticës Kerç, ka urdhëruar krijimin e një komisioni qeveritar për të hetuar incidentin. Lajmi është bërë i ditur nga zëdhënësi i Kremlinit, Dmitry Peskov.
Peskov tha se: “Presidenti ka udhëzuar kryeministrin të formojë një komision qeveritar për të përcaktuar shkaqet e incidentit dhe për të eliminuar pasojat e tij sa më shpejt të jetë e mundur. Komisioni do të përbëhet nga krerët e Territorit të Krasnodarit dhe të Krimesë, përfaqësues të Gardës Kombëtare Rosgvardia, Shërbimi Federal i Sigurisë dhe Ministrisë së Brendshme.
Ai shtoi se ministri i transportit Vitaly Savelyev dhe ministri i situatave emergjente Aleksandr Kurenkov po udhëtojnë në vendin e ngjarjes.
Ngjarja ndodhi mëngjesin e sotëm, ndërsa ura është e vetmja që lidh Krimenë me Rusinë. Ura përtej ngushticës Kerç u hap nga Presidenti Vladimir Putin në vitin 2018, katër vjet pasi Moska aneksoi ilegalisht Krimenë./Opinion.al
