Policia e Vlorës ka informuar se është proceduar në gjendje të lirë një shtetas kosovar, të cilit gjatë qëndrimit në një hotel i ka rënë nga ballkoni një vajzë që e shoqëronte.
Sipas uniformave blu, gjatë kontrollit të ushtruar në dhomën e hotelit, ku po qëndronte çifti, është gjetur dhe sekuestruar një sasi lënde të dyshuar narkotike cannabis sativa, një sasi lënde të dyshuar narkotike ekstazi dhe një peshore elektronike.
Ndërsa shtetasja e cila ra nga ballkoni i hotelit ndodhet në spital jashtë rrezikut për jetën.
“Specialistët për Hetimin e Trafiqeve dhe Narkotikëve në DVP Vlorë referuan materialet në Prokurori, për veprën penale “Prodhimi dhe shitja e narkotikëve”, dhe nisi procedimi penal në gjendje të lirë për shtetasin K. G., 29 vjeç, banues në Kosovë. Gjatë kontrollit në dhomën e hotelit ku po qëndronte ky shtetas, së bashku me shtetasen E. B., e cila rrëzua aksidentalisht nga ballkoni i këtij hoteli, shërbimet e Policisë kanë gjetur dhe sekuestruar një sasi lënde të dyshuar narkotike cannabis sativa, një sasi lënde të dyshuar narkotike ekstazi dhe një peshore elektronike. Shtetasja E. B. ndodhet në spital, jashtë rrezikut për jetën”,-njofton policia./Opinion.al
