Kryetari i Partisë Demokratike, Lulzim Basha, në një konferencë për mediat, i ka bërë thirrje SPAK që të veprojë dhe mos presë shkarkimin e ministrit të radhës për të bërë arrestimin.
Gjatë fjalës së tij, Basha deklaroi se po bëhet gati kurbani i radhës për aferën e Inceneratorëve, me shpresën që të shpëtoje koka e kësaj afere, Edi Rama.
“Puna e nisur në këtë drejtim është përshëndetur ditën e parë, por është e pamjaftueshme. Duke shprehur mbështetjen e PD, të opozitës ju kërkoj të veproni pa humbur kohë për të ndaluar vazhdimin e vjedhjes së parave të shqiptarëve. Vazhdimi i pagesave ndaj atyre që organet e drejtësisë i kanë rrethuar me shiritin skenë krimi është një krim më vete. Kjo pagesë rëndon mbi ata, por SPAK duhet të përdorë të gjithë instrumentet që mos paguhet asnjë qindarkë ndaj grupit kriminal.
I kërkoj të veprojnë sot me arrestimin e përgjegjësit. Nuk mjafton arrestimi i bishtit, SPAK mos të presë që të shkarkojë ministrin e radhës që pastaj ta arrestojë. E qartë është se kurbani i radhës për këtë afere po bëhet gati me shpresën që të shpëtojë koka e kësaj afere, por nuk ka shqiptar, nuk ka njeri mos e kuptojë që e gjithë kjo skemë korruptive nuk mund të ndërtohej dhe zbatohej pa miratimin e Edi Ramës. Ndaj kjo është thirrja që kam ndaj SPAK”, tha Basha./Opinion.al
