Prokuroria e Posaçme Kundër Korrupsionit dhe Krimit të Organizuar (SPAK) ka nisur verifikimet për nxjerrjen e të dhënave personale të votuesve në Tiranë përmes portalit qeveritar E-Albania.
Sipas Abc news është duke u verifikuar nëse kjo database është vënë në funksion të fushatës elektorale për zgjedhjet e 25 prillit.
SPAK do të marrë një kopje të të dhënave në Kryeministri për të verifikuar nëse janë te njëjta me ato të e-Albania apo janë të dhëna të vetë Partisë Socialiste.
Lidhur me këtë situatë ditën e djeshme reagoi Partia Demokratike përmes kandidatit për deputet Enkelejd Alibeaj. Në një dalje për mediat, ditën e djeshme Alibej kërkoi nisjen e hetimeve nga SPAK duke e cilësuar marrjen e të dhënave si shkelje të rëndë të privatësisë.
Ndërkohë, dje ka reaguar dhe Agjencia Kombëtaree Shoqërisë së Informacionit (AKSHI), e cila hodhi poshtë këto pretendime.
“Agjencia Kombëtare e Shoqërisë së Informacionit garanton qytetarët shqiptarë se në asnjë rrethanë të dhënat e disponuara nga AKSH-i as nuk janë përdorur, po as nuk mund të përdoren teknikisht nga partitë politike ose vetë qeveria për qëllime politike apo elektorale”, thuhej në reagimin e AKSHI-t./Opinion.al
