Kryedemokrati, Lulzim Basha, gjatë një dalje publike pasditen e sotme u ndal sërish te premtimet e Edi Ramës para se të vinte në pushtet.
Në një deklaratë nga selia blu, Basha u shpreh se Shqipëria ka mbetur në vend numëro dhe shkaku për këtë është kryeministri Rama, që nuk ka mbajtur premtimet e bëra.
Sipas kryedemokratit, janë me dhjetëra e qindra premtime të Ramës, që ai nuk i ka mbajtur, dhe as ka kërkuar falje për këtë.
“Shqiptarët i mbajnë mend shumë mirë premtimet e Ramës, që nuk janë 9, por dhjetëra e qindra premtime që ai ka bërë dhe nuk i ka mbajtur. Dje vetëm kujtova një pjesë të vogël të këtyre premtimeve. Një kryeministër që nuk i mban premtimet, me të cilat vjen në pushtet, nuk ka të drejtën morale të kërkojë një mandat tjetër. Jo vetëm që nuk ka kërkuar falje që nuk ka mbajtur asnjë premtim të vetëm, tani po vjen me të tjera premtime boshe. Vetëm propagandë, asnjë premtim të mbajtur. Rezultati, Shqipëria ka ngecur në vend numëro. Shumica e qytetarëve janë më të varfër. Është një plagë e madhe, që përkthehet në emigracion. Shqipëria ka mbetur në vend numëro, ndërkohë që të gjitha vendet rreth nesh kanë bërë progres. Përgjegjësi i vetëm për këtë është Edi Rama, sepse ka bërë shumë premtime dhe nuk ka mbajtur asnjë. Tani do na sjellë premtime të tjera, dy muaj para se shqiptarët do t’i japin me votë verdiktin që meriton”, tha Basha.
Gjithashtu Lulzim Basha uroi Partinë Vetëvendosja për fitoren e zgjedhjeve në Kosovë, ndërsa e cilësoi procesin zgjedhor një arritje të jashtëzakonshme për qytetarët e Kosovës. Ai premtoi se kur PD të vijë në pushtet do të kenë bashkëpunim të mirë mes tyre.
“Uroj LVV për fitoren në Kosovë. I uroj të gjithë në Kosovë për një standard model në zgjedhje. Kjo është një arritje e jashtëzakonshme e qytetarëve të Kosovës. Kosovën e presin sfida të mëdha përpara, ndaj i uroj fituesve në zgjedhje dhe partive të tjera, që të bëjnë gjithçka në sfidat që i presin për përmbushjen me sukses të pritshmërive të qytetarëve të Kosovës. I garantoj që sot dhe pas zgjedhjeve të 25 prillit unë dhe PD do të jemi në krahun e tyre për të bashkëpunuar fuqishëm në përfitim të zhvillimit, punësimit, të dy vendeve tona”, u shpreh ai./Opinion.al
